İngiltərə millisinin keçmiş baş məşqçisi Sven-Qoran Eriksson xərçəng xəstəliyinə tutulduğunu açıqlayıb.

Publika.az xəbər verir ki, "Sky Sports"a danışan isveçli mütəxəssisin sözlərinə görə, onun ən yaxşı halda bir il ömrü qalıb.

“Hamı anlayır ki, mənim pis xəstəliyim var. Hər kəs bunun xərçəng olduğunu təxmin edirdi. Bəli, elədir. Amma bacardığım qədər mübarizə aparmalıyam. Ən yaxşı halda bir ilim var, ən pis halda daha az. Heç bir ciddi ağrı hiss etmirəm. Amma mənə elə bir xəstəlik diaqnozu qoyulub ki, onu ləngitmək olar, amma müalicəsi mümkün deyil.

Bu barədə düşünməmək daha yaxşıdır, çünki beyninizi aldatmalı olacaqsınız. Hər zaman bu haqda düşünə, evdə oturub yazıq olub özümü bəxtsiz hesab edə bilərdim. Ən asan yol bunu bu şəkildə etməkdir. Ancaq müsbəti tapmağa çalışmaq və uğursuzluğa qapılmamaq daha müdriklikdir”.

Qeyd edək ki, 75 yaşlı isveçli mütəxəssis 2001-2006-cı illərdə İngiltərə millisini çalışdırıb. O, "Benfika", "Roma", "Sampdoriya" və "Latsio"ya da rəhbərlik edib. Eriksson "Benfika"ya üç dəfə çempionluq qazandırıb və "Roma" ilə İtaliya kubokunu əldə edib.

Heybət