Göyçayda 7 otaqdan ibarət ikimərtəbəli evdə yanğın olub.
QÜTB.AZ xəbər verir ki, hadisə rayonun Zakir Nəcəfov küçəsində, 62 yaşlı Rövşən Fərrux oğlu Əhmədova məxsus olan fərdi yaşayış evində baş verib. Ümumi sahəsi 384 kvadratmetr olan evin ikinci mərtəbəsində 192 kvadratmetr sahəni əhatə edən 3 otaq və dam örtüyü yanar konstruksiyaları ilə birlikdə alışıb.
Hadisə yerinə FHN-in Göyçay Yanğından Mühafizə Hissəsinin canlı qüvvəsi və texnikası cəlb edilib. Yanğın söndürülüb, evin birinci mərtəbəsi və yaxınlıqda olan tikililər yanğından mühafizə edilib.
Xoşbəxtlikdən hadisə zamanı xəsarət alan olmayıb. Yanğının hansı səbəbdən baş verdiyi hələ məlum deyil.
Faktla bağlı araşdırma aparılır.
