Hollivuddakı tətillər səbəbindən təxirə salınan 75-ci "Emmi" mükafatlandırma mərasimi nəhayət ki, dünən baş tutub.
Publika.az xarici mətbuata istinadən xəbər verir ki, əvvəlcə "Emmi" mərasimi 2023-cü ilin sentyabrında keçirilməli idi, lakin Hollivud kino xadimlərinin və aktyorlarının etirazları səbəbindən dörd ay təxirə salındı - bu, 20 ildə ilk dəfə baş verdi. Təşkilatçıların sözlərinə görə, “Emmi” 2022-ci il iyunun 1-dən 31 may 2023-cü il tarixinə qədər yayımlanan layihələrə verilib, odur ki, eyni şouların müxtəlif mövsümlərinə mükafatlar təqdim olunub.
Nominasiyaların sayına görə liderlər müvafiq olaraq 27 və 24 nominasiya qazanan “Varislər” və “İkimizdən biri” serialları olub. Onları 23 nominasiya ilə “Ağ Lotus” və 21 nominasiya ilə “Ted Lasso” izləyib. Lakin biz diqqəti qırmızı xalçaya yönəltməyi təklif edirik. Üstəlik, istirahət etməyə çox vaxtımız yoxdur. Bir həftə sonra "Oskar" nominasiyaları açıqlanacaq və Hollivudda vəziyyət yenidən gərginləşəcək!
Bu mövsümün əsas trendlərindən biri də qırmızı paltarlardır. "Emmi"də ana olmağa hazırlaşan Syuki Uoterhous və Kamila Morrone bu rəngə müraciət edib, lakin bir çox başqa ulduzlar sistemə qarşı çıxmaq qərarına gəldilər. Ən çox diqqət çəkən görüntü isə "Gucci" imzalı yaşıl paltarına güvənən Cessika Çesteyn olub. Əlbəttə ki, yaşıl kürən saçlı qızlara çox yaxşı uyğunlaşdığını bilirdik, amma bu xüsusi ton belə mərasimlərdə nadir hallarda gözə dəyir. Aktrisa isə risk etməkdən qorxmayıb.
Eyni sözləri Selena Qomezin geyimi haqqında demək olmaz. Son zamanlar müğənni tez-tez müxtəlif obrazları sınaqdan keçirməyə başlayıb. Bu, təqdirəlayiqdir, lakin o, hələ də öz üslubunu tapmayıb. Ulduz bu dəfə 450 min biserlə bəzədilmiş "Oscar de la Renta" libası geyinib. Rəng və paltarın fasonu onun yaşına uyğun deyil, nəhəng yaqut qaşlı "Tiffany & Co" boyunbağı isə obrazını daha da ağırlaşdırıb. Buna görə də, fonda həmkarlarına uduzub.
Gecənin qonaqları arasında italyan aktrisası Monika Belluççi də olub. O, gecəyə rejissor sevgilisi Tim Bertonla gəlib. Klassik smoking geyinən ulduz qara rəng ənənəsinə sadiq qalıb.
Qaliblərin tam siyahısı
"Ən yaxşı komediya serialı" - "Ayı"
"Ən yaxşı dram serialı" - "Varislər"
"Ən yaxşı mini serial" - "Boğuşma"
Ən yaxşı komediya aktrisası: Kuinta Branson (Abbott İbtidai məktəbi)
Ən yaxşı komediya aktyoru - Ceremi Allen Uayt (Ayı)
Ən yaxşı dram aktrisası: Sara Snuk (Varislər)
Ən yaxşı dram aktyoru: Kiran Kalkin (Varislər)
“Miniserialda ən yaxşı aktrisa” – Ali Vonq (Boğuşma)
"Miniserialda ən yaxşı aktyor" - Stiven Yanq (Boğuşma)
Komediyada Ən Yaxşı Köməkçi Aktrisa - Ayo Edebiri (Ayı)
Komediyada Ən Yaxşı Köməkçi Aktyor - Ebon Moss-Bakrak (Ayı)
Dramada ən yaxşı ikinci plan qadın rolu - Cennifer Kulic (Ağ Lotus)
Dramada ən yaxşı ikinci plan aktyoru - Metyu Makfaden (Varislər)
Mini serialda ən yaxşı ikinci plan qadın rolu: Nisi Neş (Canavar: Cefri Damerin hekayəsi)
Miniserialda ən yaxşı ikinci plan aktyoru - Paul Uolter Hauzer (Qara quş)
Ən yaxşı komediya rejissorluğu - Kristofer Storer (Ayı)
"Dram filmində ən yaxşı rejissor işi" - Mark Mylod (Varislər)
"Mini-serialda ən yaxşı rejissor işi" - Li Son-Cin (Boğuşma)
Ən yaxşı komediya ssenarisi - Kristofer Storer (Ayı)
Ən yaxşı dram ssenarisi - Cessi Armstronq (Varislər)
“Ən yaxşı mini-serial ssenarisi” – Li Son-Cin (Boğuşma)
