Azərbaycan Respublikasının Prezidenti İlham Əliyevin rəhbərliyi altında rəşadətli Azərbaycan Ordusunun 44 günlük Vətən müharibəsindəki şanlı zəfərindən dörd il ötməsi və 9 Noyabr - Bayraq Günü ilə əlaqədar olaraq Azərbaycan Tələbə Gənclər Təşkilatları İttifaqı (ATGTİ) və üzv Tələbə Gənclər Təşkilatları (TGT) tərəfindən silsilə tədbirlər keçirilib.

QÜTB.AZ xəbər verir ki, ATGTİ, Bakı və ətraf ərazilərdə yerləşən Tələbə Gənclər Təşkilatlarının 3000-dən çox fəalı Birinci Fəxri xiyabanda ümummilli lider Heydər Əliyevin və İkinci Fəxri xiyabanda Azərbaycanın müstəqilliyi və ərazi bütövlüyü uğrunda canlarından keçən şəhidlərimizin əziz xatirəsini ehtiram və minnətdarlıqla yad edib.

Azərbaycan Respublikası Gənclər Fondunun dəstəyi, ATGTİ, “Böyük Qayıdış” Gənclər Təşkilatının və Gənclərin İnkişaf və Karyera Mərkəzinin (GİKM) birgə təşkilatçılığı ilə “Qəhrəmanını Tanı” layihəsi çərçivəsində gənclər arasında qəhrəman qazi və döyüşçülərimizin tanıdılması məqsədilə silsilə görüşlər reallaşdırılıb. Ümumilikdə 2000-ə yaxın tələbəni əhatə edən layihə çərçivəsində Vətən uğrunda canlarını fəda etmiş qəhrəman əsgər və zabitlərin xatirəsi hörmət və ehtiramla anılmış, qazilərimizin döyüş yolları haqqında gənclərə məlumat verilib. 

Həmçinin Gənclər Fondunun dəstəyi ilə reallaşan layihələr çərçivəsində Vətən müharibəsində qazanılan qələbə və Bayraq Gününün qeyd olunması məqsədilə ali və orta ixtisas təhsili müəssisələrinin Tələbə Gənclər Təşkilatları tərəfindən “Şanlı Zəfərin Yadigarı”, “Zəfər Nəğməsi”, “Üç rəngli bayrağımın kölgəsində mən”, “Bayrağımız Qürurumuzdur”, “Günlərdən Zəfər”, “Zəfərin 4 anı”, “Qalibiyyət tariximizin inciləri”, “Zəfərimizi tanıyaq, tanıdaq!”, “Dalğalanan Bayrağımız”, “Bayraqdan İstiqlala:Tarixin İzləri”, “Qələbə İdman Oyunları” “Nə? Harada? Nə zaman? İntellektual Yarışı”, “"Zəkanın Zəfəri" ixtisaslar arasında intellektual yarış”, “Dünya zəfər tarixinin zirvəsi - 44 günlük Vətən müharibəsi”, “Şanlı Bayrağım!”, “Yarımçıq xatirələr” kimi  bir çox müxtəlif istiqamətli görüşlər, konfranslar, ekskursiyalar, konsert proqramları, panel müzakirə və dəyirmi masalar keçirilib.

Ümumilikdə İttifaq tərəfindən reallaşdırılmış kompleks tədbirlər ölkəmizin müxtəlif regionlarını əhatə etməklə, 80-dən çox ali və orta ixtisas təhsil müəssisəsində təhsil alan 9000-dən çox tələbəni qeyd edilən müxtəlif istiqamətli silsilə layihələrə cəlb edib.