“1 sentyabr 2024-cü il tarixindən keçiriləcək parlament seçkiləri əvvəlkilərdən daha fərqlidir və xüsusi önəm kəsb edir. 2020-ci ildə 44 günlük müharibədə qazanılan qələbə və 2023-cü ildə həyata keçirilən antiterror əməliyyatları nəticəsində 30 il ərzində işğal altında qalmış torpaqlarımız azad edildi və Azərbaycan suverenliyini tam şəkildə bərpa etdi. Bu gün artıq Şuşa, Laçın, Xankəndi, Zəngilan, Füzuli və digər ərazilərə insanların yaşaması, səsverməyə qatılması dövlətimizin qüdrətini göstərir”.
QÜTB.AZ xəbər verir ki, bu fikirləri “Seçki 2024” Müstəqil Media Mərkəzinə açıqlamasında “Psixoloji Xidmət və Tədqiqatlar Mərkəzi” İctimai Birliyinin sədri, psixologiya üzrə fəlsəfə doktoru Təranə Paşayeva deyib.
T.Paşayeva bildirib ki, seçkilərdə çoxsaylı siyasi partiyanın iştirakı Azərbaycanda demokratik seçki mühitinin formalaşmasını bir daha təsdiq edir: “Digər tərəfdən, namizədlər arasında təcrübəli siyasətçilərlə yanaşı, gənclərin də sayının kifayət qədər olması Azərbaycanda seçkiyə diqqət və ədalətdən qaynaqlanır. Yuxarıda qeyd etdiklərimi ümumiləşdirərək deyə bilərəm ki, 1 sentyabr tarixində keçiriləcək seçkilər Azərbaycan parlamentinin fəaliyyətində yeni dövrün əsasını qoyacaq”.
