İranlı pop ulduz Şervin Hacıpur “Qremmi” mükafatına layiq görülmüş mahnısına görə üç il həbs cəzası alıb.

Publika.az xəbər verir ki, bu barədə “Alarabiya News” məlumat yayıb.

Hacıpurun yazdığı Baraye mahnısı 2022-ci ilin sentyabrında 22 yaşlı Məhsa Əmininin ölümü ilə başlayan İran etiraz hərəkatının himni olub. Nümayişlər zamanı müğənni treki buraxıb və daha sonra keçən fevral ayında ona görə “Qremmi” mükafatı qazanıb.

Co Baydenin 71 yaşlı həyat yoldaşı Jill Bayden "Sosial Dəyişiklik üçün Ən Yaxşı Mahnı" yeni kateqoriyasında qalib gəldiyi üçün Hacıpuru mükafatlandırmaq üçün səhnəyə çıxıb. ABŞ prezidentinin həyat yoldaşı bu mahnını “azadlığa və qadın hüquqlarına güclü və poetik çağırış” adlandırıb.

Müğənni bu gün instaqram səhifəsində "milli təhlükəsizliyi pozmaq məqsədilə insanları iğtişaşlara səsləmək və təhrik etmək" maddəsi ilə 3 il müddətinə azadlıqdan məhrum edildiyini açıqlayıb. Onun da “rejim əleyhinə təbliğat”da təqsirli bilindiyi məlumdur.

Bundan əlavə, məhkəmənin qərarına əsasən, Hacıpur İslam İnqilabının “nailiyyətlərini təbliğ edən” fəaliyyətlərdə iştirak etməlidir.