ABŞ-ın Ohayo ştatında polis tərəfindən zorakılıqla saxlanılan 53 yaşlı Frank Tayson adlı şəxsin polis zorakılığı nəticəsində öldüyü məlum olub. Əlləri arxadan qandallı ikən polislər kişinin boynunu sıxaraq boğulmasına səbəb olublar.

Publika.az xəbər verir ki, aprelin 18-də Ohayo ştatının Kanton bölgəsində yol qəzasından qaçdığı iddia edilən qaradərili amerikalının polis zorakılığı nəticəsində ölməsinin görüntüləri bu gün ictimaiyyətə açıqlanıb.

Hadisəyə müdaxilə edən polis məmurlarının dəbilqə kameralarından lentə alınan görüntülər sosial mediada sürətlə yayılıb və 2020-ci ildə polis zorakılığı nəticəsində dünyasını dəyişən qaradərili amerikalı Corc Floydun ölümü ilə müqayisə edilib.

Üzü üstü yerə uzanmış, əlləri qandallı olan qaradərili amerikalının boynunu polis dizi ilə sıxıb. Onun dəfələrlə “nəfəs ala bilmirəm” dediyi anlar lentə alınıb.

Bir neçə dəqiqədən sonra polis hərəkətsiz qalan qaradərili şəxsin sağ olub-olmadığını yoxlayır, Taysonun nəfəs almadığını anlayır və ürək masajı etməyə başlayır. Sonra onu təcili yardım maşını ilə xəstəxanaya aparırlar.

Polisin verdiyi məlumata görə, Tayson xəstəxanada dünyasını dəyişib və hadisədə iştirak edən polis əməkdaşları istintaqa təhvil verilib.

Aysel