İran qüvvələrinin İraqın Ərbil və Suriyanın İdlib şəhərlərinə hücumu haqda məlumat vermişdik. Hücum nəticəsində Bərzani ailəsinə yaxın iş adamı Peşrev Dizayi həyatını itirib.

Publika.az xəbər verir ki, İran raketləri 50 yaşlarında olan kürd iş adamı Peşrev Dizayinin evini hədəf alıb. Hücum nəticəsində Dizayi ilə birlikdə qızı Cina və Kerem Mikail adlı iş adamı ölüb. Dizayinin həyat yoldaşı və iki oğlunun da yaralandığı bildirilib.

Təxminən 2,5 milyard dollarlıq sərvəti ilə İraqın ən zəngin adlarından biri olan Dizayi Kürdüstan Demokratik Partiyasına və Bərzani ailəsinə yaxın biri olub. Dizayinin sahibi olduğu "Falcon" Şirkətlər Qrupu xüsusilə İraqda həyata keçirdiyi iri tikinti layihələri ilə diqqət çəkir. Şirkət neft və təbii qaz sektorunda da fəaliyyət göstərir.

Bu mövzuda rəsmi məlumat olmasa da, Dizayinin Ərbil neftinin İsrailə satışında vasitəçi olduğu və İsraillə əlaqələri olduğu iddia edilib.

Roza Şəfiyeva