“Crocus City Hall” konsert zalında terror aktı törətməkdə təqsirləndirilən şəxslərlə bağlı daha bir məlumat üzə çıxıb.

Publika.az xəbər verir ki, terrorçuları həm hazırlıq mərhələsində, həm də silahlı hücumdan sonra “Telegram” messencerində səsli mesajlar vasitəsilə bir kişi koordinasiya edib.

Bu barədə Rusiya Federasiyasının İstintaq Komitəsi məlumat yayıb.

Bildirilib ki, təqsirləndirilən şəxslər bu məlumatı özləri etiraf ediblər. Onlar həmin şəxsin özünü "nickname" ilə təqdim etdiyini deyiblər.

Koordinatorun göstərişi ilə terrorçular hadisədən sonra avtomobillə Rusiya-Ukrayna sərhəddinə doğru gediblər. Onların məqsədi sərhədi keçərək Kiyevə getmək və vəd olunan mükafatı almaq olub.

Xatırladaq ki, martın 22-də Moskva vilayətində yerləşən “Crocus City Hall” konsert zalında törədilən terror aktı nəticəsində 143 nəfər həlak olub, 382 nəfər yaralanıb.