Çexiyanın müxalif “Azadlıq və Birbaşa Demokratiya” hərəkatının lideri Tomio Okamura ölkə parlamentində rekord uzunluqda çıxış edib. Ölkə vətəndaşları üçün poçtla səsvermənin mümkün tətbiqi ilə bağlı debatda danışan siyasətçinin nitqi 10 saat 44 dəqiqə davam edib.

Publika.az xəbər verir ki, Okamura həmkarlarını əvvəlcədən xəbərdar edib ki, o, bir il əvvəlki rekordunu üstələmək niyyətindədir. Həmin vaxt o, 7 saat 7 dəqiqə fasiləsiz danışıb.

Beləliklə, müxalifətçi təkcə özünü deyil, 1998-ci ilin fevralında Kuba parlamenti qarşısında 7 saat 15 dəqiqə çıxış edən Fidel Kastronu da keçə bilib.

Məlumata görə, nitqinin dördüncü saatından sonra siyasətçi pencəyini çıxarmalı olub, iki saatdan sonra o, həmkarlarına qəhvə gətirmələrinə işarə edib, ancaq bir stəkan su ala bilib.

Qeyd edək ki, Çexiya parlamentində partiya liderlərinin çıxışı zamanla məhdudlaşmır. Nəticədə Okamuranın çıxışından sonra müzakirənin növbəti günə təxirə salınması qərara alınıb.