ABŞ Haitidə artan zorakılıq fonunda öz vətəndaşlarını çarter helikopterləri ilə ölkədən təxliyə etməyə başlayıb.

Publika.az xəbər verir ki, bu barədə ABŞ Dövlət Departamentinin mətbuat katibinin birinci müavini Vedant Patel jurnalistlər üçün keçirdiyi növbəti brifinqdə bildirib.

"Martın 20-dən etibarən ABŞ hökuməti öz vətəndaşlarının Haitidən təhlükəsiz çıxışını asanlaşdırır. Biz Port-au-Prinsdən Dominikan Respublikasının paytaxtı Santo Dominqoya çarter reysləri təşkil edirik. ABŞ hökumətinin nümayəndələri konsulluq yardımı göstərmək üçün oradadırlar”, - Patel deyib.

O, həmçinin insanların oradan uça bilməsi üçün Kap-Aityendən uçuşların mümkünlüyünü araşdırmağa davam edəcəklərini vurğulayıb.

Məlumata görə, bu günə qədər təxminən 1,6 min amerikalı Haitidən təxliyə üçün hökumətə müraciət edib.

Qeyd edək ki, martın 9-da Haitinin paytaxtı Port-o-Prensdə yerli silahlı dəstələr prezident sarayına hücum ediblər. Cinayətkarlar Daxili İşlər Nazirliyinin və polis idarəsinin binasına da basqın ediblər.