NATO son 24 ilin ən böyük təlimi ilə Rusiyaya qarşı gücünü nümayiş etdirir. NATO-nun keçmiş baş komandanı, ABŞ ordusunun təqaüddə olan generalı Frederik B. Hodcesin sözlərinə görə, əsl təhlükə Donald Trampın prezident seçilmə ehtimalıdır. “Tramp gəlsə, NATO-Rusiya müharibəsi olacaq”.
Publika.az xəbər verir ki, NATO 1991-ci ildən bəri ən böyük təlimə Rusiya ilə müharibə vəziyyətində olan Ukraynanın sərhəd qonşusu Polşada başlayıb . NATO-ya üzv 31 ölkədən 90 min əsgər, 80 döyüş təyyarəsi, 1100 zirehli döyüş maşını və 55 döyüş gəmisinin iştirak etdiyi təlim Rusiyaya qarşı güc nümayişi kimi qiymətləndirilir. NATO-nun davam edən müharibəyə necə cavab verəcəyi, ABŞ-ın NATO-nun istiqamətini Çinə yönəltməyə çalışıb-çalımayacağı və Donald Trampın prezident seçiləcəyi təqdirdə ABŞ ilə NATO arasında yenidən gərginliyin yaranıb-yaramayacağı kimi kritik suallar narahatlıq doğurur.
ABŞ Ordusunun keçmiş NATO Baş Komandanı bildirib ki, Donald Tramp ittifaqları sevmir və Birləşmiş Ştatların təcrid olunmuş xarici siyasət yürütməsini istəyir:
“Trampın prezidentliyi Avropanı müdafiəsiz qoyacaq və Rusiyanın daha da aqressiv davranmasına səbəb olacaq. Bu halda NATO Rusiyanın hücumuna məruz qalacaq. Əgər Tramp əvvəlki prezidentliyi dövründə etdiyi kimi NATO-da çat yaradacaq bəyanatlar versə, Rusiya sonda "indi hücum edə bilərik" deyəcək. Onu da bilirik ki, Tramp bundan əvvəl Avropa Komissiyasının sədri Ursula fon der Leyenə ABŞ-ın bunu etməyəcəyini demişdi. Trampı noyabrda Ağ Evdə görsək, qarşıdakı 20 ildə NATO-Rusiya müharibəsinin də şahidi olacağıq, çünki Tramp Avropaya dəstəyə son qoymaq istəyir.
NATO-nun Polşadakı təlimi təkcə Rusiyaya deyil, ABŞ-a da bir mesajdır. Təlim həm də alyansın avropalı üzvlərinin Donald Trampa mesajı kimi qiymətləndirilməlidir: "İttifaq güclüdür və biz müharibəyə hazırıq". Hətta Rusiyanın NATO-ya hücum planlarının belə ictimaiyyətə sızdığı bir vaxtda biz Moskvaya qarşı səssiz diplomatiya ilə mübarizə apara bilmərik”.
Hodcesi əlavə edib ki, Rusiya Avropa ölkələrinin əsas problemidir:
“Əlbəttə, deyə bilərik ki, ABŞ müdafiə diqqətini, xərclərini və hətta NATO-nu Çin təhlükəsinə qarşı yönəltməyə çalışır, lakin həm Ağ Ev, həm Konqres, həm də Pentaqon Avropadakı Rusiya təhlükəsinə qarşı öz resurslarından maksimum istifadə edir. Burada prioritet ABŞ-ın bir millət kimi öz milli təhlükəsizlik narahatlığıdır.
Sakit okeanda Çinlə mübarizə ABŞ-ın əsas təhlükəsizlik anlayışı kimi müəyyən edilib. Qlobal təhlükəsizlik anlayışında Rusiyaya qarşı mübarizə prioritetdir. ABŞ hər iki məsələdə böyük səylər göstərir və birinə üstünlük verərkən birini istisna etmir”.
Aysel Şahmar
