ABŞ və İraq tezliklə Amerika qoşunlarının Yaxın Şərq ölkəsindən çıxarılması ilə bağlı danışıqlara başlayacaq.

Publika.az xəbər verir ki, bu barədə CNN mənbələrə istinadən məlumat yayıb.

Məlumata görə, "ABŞ və İraq Ali Hərbi Komissiya çərçivəsində dialoqa başlamaq üçün razılaşmaya yaxındırlar" və bu zaman gələcək əməliyyatın həyata keçirilməsi üçün addımların müəyyən ediləcəyi gözlənilir.

Qeyd edildiyi kimi, Vaşinqton qoşunların çıxarılması cədvəlinin İraqdakı mövcud vəziyyəti, hökumətin və təhlükəsizlik qüvvələrinin sabitlik dərəcəsini nəzərə almasını istəyir. Öz növbəsində İraq rəhbərliyi hesab edir ki, qoşunların çıxarılması tarixləri heç bir vəziyyətdən asılı olmamalıdır.

Yanvarın 5-də Ərəb Respublikasının Baş naziri Məhəmməd əl-Sudani beynəlxalq koalisiya qüvvələrinin mövcudluğu ilə bağlı əsaslandırmaların sona çatdığını və Bağdadın ölkədə xarici hərbçilərin mövcudluğuna son qoymaq üçün konkret addımlar atmaq niyyətində olduğunu bildirib. O qeyd edib ki, hakimiyyət “İraqda koalisiya qüvvələrinin mövcudluğunu dayandırmaq üçün tədbirlər hazırlamaq üçün yaradılmış ikitərəfli komitə çərçivəsində danışıqların başlanması tarixini müəyyənləşdirir”. Əl-Sudaninin bəyanatı şiə “Hizbullah əl-Nücəba” hərəkatının komandirlərindən biri Əbu Təqvanın Bağdadda ABŞ-ın pilotsuz təyyarəsinin zərbəsi nəticəsində öldürülməsi və ən azı altı nəfərin yaralanmasından sonra verilib.

Öz növbəsində, Pentaqon yanvarın 8-də bildirib ki, Birləşmiş Ştatlar hazırda təxminən 2,5 min nəfər olan qoşunlarını İraqdan çıxarmağı planlaşdırmır. Müdafiə Nazirliyinin sözçüsü Patrik Rayder İraq hökumətinin hər hansı tələbindən xəbərsiz olduğunu bildirib. Pentaqonun sözçüsü əlavə edib ki, ABŞ hərbçiləri bu ölkə hökumətinin dəvəti ilə İraqdadır.

Tural