İranın xarici işlər naziri Hüseyn Əmir Abdullahian və Türkiyənin xarici işlər naziri Hakan Fidan iki ölkə arasında əlaqələrin inkişafı, iki ölkə prezidentləri arasında son razılaşmaların icrasını müzakirə ediblər.

Publika.az xəbər verir ki, telefon danışığı zamanı Qəzza zolağı ətrafındakı vəziyyətlə bağlı da fikir mübadiləsi aparılıb.

İran Xarici İşlər Nazirliyinin rəhbəri ölkə prezidentinin Ankaraya son səfəri zamanı əldə olunan razılaşmaların həyata keçirilməsi üçün birgə səylərin davam etdirilməsinin vacibliyini vurğulayıb.

Əmir Adullahian Qəzzada baş verən son hadisələri də xatırladıb, İsrailin fələstinlilərə qarşı hərəkətlərini pisləyib və İslam Əməkdaşlıq Təşkilatına üzv ölkələrin xarici işlər nazirlərinin gələcək iclasında “işğal rejiminin soyqırımı və aparteidin dayandırılması istiqamətində nəticələrə və təsirli addımlara ümid etdiyini bildirib.

Öz növbəsində Türkiyənin xarici işlər naziri Hakan Fidan da telefon danışığı zamanı İran prezidentinin Ankaraya səfərinin əhəmiyyətini qeyd edib və Ankaranın Tehranla əməkdaşlığı inkişaf etdirməyə hazır olduğunu vurğulayıb.

O, həmçinin “sionist təcavüzünə qarşı çıxmaq və dayandırmaq üçün” islam ölkələri arasında koordinasiyaya ehtiyac olduğunu deyib.

Cəmilə