Ermənistan üçün qazın qiymətinin 2031-ci ilə qədər dəyişməz qalacağını gözləməyə əsas var.

Publika.az xəbər verir ki, bunu Ermənistan parlamentində regional inteqrasiya və Avrasiya məsələləri üzrə parlament komissiyasının iclasında ərazi idarəetmə və infrastruktur nazirinin müavini Akop Vardanyan deyib.

O xatırladıb ki, 2022-ci ildə Rusiya və Ermənistan arasında təbii qazın qiymətinin əsasları ilə bağlı 2013-cü il qaz sazişinə əlavə imzalanıb. Bu sənədə görə, Ermənistan üçün qazın qiyməti 2031-ci ilin sonuna kimi dəyişməməlidir. Nazir, həmçinin kilokaloriya üzrə müəyyən edilmiş normalardan kənara çıxdıqda mümkün əlavə ödənişləri və ya güzəştləri nəzərdə tutan qazın kalorililiyindən asılı olaraq maya dəyərinin tənzimlənməsinin konkret mexanizmlərinin mövcud olduğunu diqqətə çatdırıb.

Nazir qeyd edib ki, Ermənistan üçün qazın qiymətinin sonuncu dəfə artımı 2019-cu il yanvarın 1-də baş verib, o zaman qiymət min kubmetr üçün 150 dollardan 165 dollara qalxıb. Cəmiyyətdə qazın qiymətinin mümkün artımı ilə bağlı müzakirələrə baxmayaraq, qiymət son beş ildə dəyişməz və sabit qalıb.

"Təbii ki, qazın dünya bazar qiyməti 3 min dollara çatarsa, Ermənistanda indiki 165 dollar/min kubmetr səviyyəsini saxlamaq çətin olacaq. Lakin xatırlayırsınızsa, 2022-ci ilin müəyyən dövründə qazın qiyməti bu səviyyəyə yaxınlaşırdı, lakin bu, Ermənistanda qiymətlərə təsir etmədi”.

Nazir müavini əlavə edib ki, Ermənistan ümumi qaz bazarında ölkə üçün qiymətin dəyişməz qalması, hətta aşağı düşməsi üçün bütün səyləri göstərməlidir.

Tural