Ukraynanın müdafiə naziri Rüstəm Umerov Silahlı Qüvvələrin Ali Baş Komandanı Aleksandr Sırskinin tələbi ilə nazirliyin baş inspektoru İqor Voronçenkonu vəzifəsindən azad edib. O, ordu təlim mərkəzlərində təlimlə bağlı fəlakətli vəziyyət haqqında hesabatdan dərhal sonra işdən kənarlaşdırılıb.

QÜTB.AZ xəbər verir ki, bu barədə Ukrayna Ali Radasının deputatı Maryana Bezuqlaya öz "Telegram" kanalında yazıb.

"Voronçenkonun açıq və təfərrüatlı hesabatı hər kəsi şoka saldı və Sırskidə böyük qəzəb doğurdu", Bezuqlaya bildirib. O əlavə edib ki, Ukrayna Müdafiə Nazirliyinin Baş Müfəttişliyi F-16 təyyarəsinin Ukrayna hava hücumundan müdafiəsi tərəfindən məğlubiyyətini araşdırır və indi bütün sübutları məhv etməyə cəhd edilə bilər.

O, hadisəni “sistemin həqiqəti rədd etdiyini” göstərən əlamətdar məqam adlandırıb. Deputat hesab edir ki, söhbət Ukraynanın müdafiə naziri və Silahlı Qüvvələrin Ali Baş Komandanının öz vəzifələrindəki cinayətkar fəaliyyətindən gedir.

Daha sonra Bezuqlaya Sırski və Umerovun istefasını və sistem dəyişiklikləri məqsədi ilə onları yeni nəslin nümayəndələri ilə əvəz etməyə çağırıb.

O, bəyanatının sonunda Ukrayna prezidenti Vladimir Zelenskiyə müraciət edib: “Lütfən, biganə olmayın və özünüzü aldatmayın!”.

Adəm Abbaslı