Türkiyənin Milliyyətçi Hərəkat Partiyasının (MHP) sədri Dövlət Baxçalı PKK terror təşkilatının ən qısa zamanda qurultay keçirərək özünü buraxması və silahlarını təhvil verməsi gərəkdiyini bildirib.

Qutb.az xəbər verir ki, bu barədə o, yazılı açıqlama verib.

Baxçalı PKK-nın özünü buraxması üçün 4 may tarixini təklif edib, qurultayın keçirilməsi üçün Muş vilayətinin Malazgirt rayonunu uyğun yer kimi göstərib.

MHP lideri PKK-nın ləğv qərarının uzadılmasının gözlənilməz nəticələrə və təxribatlara səbəb ola biləcəyi barədə xəbərdarlıq edib. 

"Bizim təklifimiz budur ki, Hıdırellez ərəfəsində, məsələn, 4 may 2025-ci il bazar günü Muşun Malazgirt rayonunda DEM Partiyasının bələdiyyə sədrinin dəstəyilə PKK qurultay keçirərək ləğv məsələsinə son qoysun və bu işi bitirsin", - MHP lideri qeyd edib.

Xatırladaq ki, PKK lideri Abdullah Öcalan 27 fevralda təşkilatın silahları yerə qoyaraq qurultay keçirib özünü buraxması barədə çağırış edib. Bundan sonra PKK 1 martdan etibarən qüvvəyə minəcək atəşkəs elan etdiyini açıqlayıb.