Avropa ölkələri və Ukrayna Rusiyanın təcavüzünə son qoymaq məqsədilə 12 maddədən ibarət sülh planı üzərində işləyir.

Qutb.az-ın məlumatına görə, "Bloomberg" yazır ki, təşəbbüsün əsas icra mexanizminə ABŞ Prezidenti Donald Tramp rəhbərlik edəcək “Sülh Şurası” daxil olacaq.

İlkin şərtlərə əsasən, Rusiya Ukraynanın nümunəsini izləyərək atəşkəslə razılaşdıqdan sonra hər iki tərəf mövcud cəbhə xəttini rəsmən təsbit etməli və hücum əməliyyatlarından imtina etməlidir.

Müqavilənin tələblərinə görə, Ukrayna ərazisindən deportasiya olunmuş bütün uşaqlar geri qaytarılacaq, hərbi əsirlər mübadilə ediləcək, Kiyevə təhlükəsizlik zəmanətləri və dağıdılmış infrastrukturu bərpa etmək üçün maliyyə dəstəyi veriləcək. Eyni zamanda, Ukraynanın Avropa İttifaqına üzvlük ərizəsinə baxılması prosesi sürətləndiriləcək.

Plan Rusiyaya qarşı sanksiyaların tədricən yumşaldılmasını nəzərdə tutur. Lakin təxminən 300 milyard dollarlıq dondurulmuş Rusiya Mərkəzi Bankı ehtiyatları yalnız Moskva Ukraynanın müharibədən sonrakı bərpasına maliyyə töhfəsi verməyə razılaşdıqdan sonra açılacaq. Əgər Rusiya döyüşləri yenidən başlasa, məhdudiyyətlər bərpa olunacaq.

Moskva və Kiyev işğal altındakı ərazilərin idarə olunması ilə bağlı ayrıca danışıqlar aparmalı olacaqlar. Bununla belə, nə Avropa, nə də Ukrayna həmin əraziləri Rusiyanın hüquqi mülkiyyəti kimi tanımayacaq. Bu məsələ sülh sazişinin ən mürəkkəb bəndlərindən biri sayılır.

Mənbələrin bildirdiyinə görə, bu plan Trampın “müharibəni hazırkı təmas xətti boyunca dondurmaq” ideyası ilə üst-üstə düşür. ABŞ lideri 16 oktyabrda Rusiya Prezidenti Vladimir Putinlə telefon danışığı aparmış və Budapeştdə şəxsi görüş barədə razılığa gəlmişdi. Lakin Reuters yazır ki, Moskvanın döyüşləri dayandırmaqdan imtina etməsi səbəbindən Tramp bu planlardan geri çəkilib. Hazırlıq məqsədilə keçirilməsi planlaşdırılan Lavrov–Rübio görüşü də bu səbəbdən ləğv olunub.