Türkiyə Böyük Millət Məclisinin (TBMM) önündə ağ rəngli "Renault Toros" markalı avtomobil yandırılıb.

Qutb.az-ın məlumatına görə, hadisə Milli Dayanışma, Qardaşlıq və Demokratiya Komissiyasının dördüncü iclası öncəsi baş verib.

Hadisə yerinə çağırılan yanğınsöndürənlər avtomobili söndürüb.

Ankara Polis İdarəsinin məlumatına görə, hadisə ilə bağlı bir nəfər – M.E.F. adlı şəxs saxlanılıb. Onun Mersin şəhərində yaşadığı, psixoloji problemlərinin olduğu və çoxsaylı cinayət keşmişinə malik olduğu qeyd olunur.

Xatırladaq ki, 1990-cı illərdə “Beyaz Toros” markalı avtomobillər xüsusilə Şərqi və Cənub-Şərqi Anadoluda baş verən naməlum qətllər qətllər və adam oğurluqları ilə assosiasiya olunur. Bu avtomobillər Jandarma Kəşfiyyat və Terrorla Mübarizə (JİTEM) qurumunun adı ilə tez-tez anılırdı. JİTEM-in uzun müddət mövcudluğu rəsmən inkar edilsə də, 2011-ci ildə Ankara Prokurorluğunun araşdırması nəticəsində qurumun qanunsuz şəkildə, rəsmi təsdiq olmadan yaradıldığı təsbit edilib.

Hadisə ilə bağlı istintaq davam edir.