Münhenqladbax "Borussiya"sı ölkə kubokunun 1/4 final mərhələsində səfərdə III Bundesliqa təmsilçisi "Saarbrüken"ə uduzaraq (1:2) mübarizəni dayandırıb. Beləliklə, turnirin bütün yarımfinalçıları bəlli olub.

Publika.az xəbər verir ki, əsas Bundesliqadan yalnız bir klub - "Bayer Leverkuzen" kubokun yarımfinalına yüksələ bilib. Almaniya futbolu tarixində ilk dəfə belə bir vəziyyət yaranıb. Bu barədə "Opta" məlumat yayıb.

Finala vəsiqə uğrunda mübarizə aparan digər komandalardan "Kayzerslautern" və "Fortuna" (Düsseldorf) ikinci, "Saarbrüken" isə üçüncü Bundesliqanı təmsil edir.

Yarış zamanı "Saarbrüken" dəfələrlə sensasiyaya imza atıb. Komanda Münhenqladbax təmsilçisindən savayı əsas liqadan “Bayern” və “Ayntraxt”ı da mübarizədən kənarlaşdırıb.

Qeyd edək ki, "Bayer Leverkuzen" Avropa Liqasının 1/8 finalında mübarizə aparan təmsilçimiz "Qarabağ"ın rəqibidir. Komandalar sabah - martın 14-də Bakıda vaxtı ilə saat 00:00-da cavab oyununa çıxacaqlar. Tərəflər arasında keçirilən ilk görüşdə qalib müəyyənləşməyib - 2:2.

Heybət