Bu gün Azərbaycanın avrokuboklardakı yeganə təmsilçisi "Qarabağ" növbəti matçına çıxacaq.

Publika.az xəbər veirr ki, "Köhlən atlar" ilk dəfə vəsiqə qazandığı UEFA Avropa Liqasının 1/8 final mərhələsi çərçivəsində "Bayer Leverkuzen"i qəbul edəcək.

Qurban Qurbanovun rəhbərlik etdiyi kollektiv üçün Almaniya təmsilçisi yad rəqib deyil. Bu mövsüm Avropanın yeganə məğlubedilməz komandası olan "asprinlər" qrup mərhələsində də "Qarabağ"a rəqib olub. Leverkuzendə təmsilçimiz 1:5, Bakıda isə minimal hesabla uduzmuşdu. Budəfəki görüşlər isə pley-off mərhələsinə təsadüf edəcək.

Təmsilçimiz Bakıda rəqibini üstələsə, "Bayer"in 34 oyunluq tarixi məğlubiyyətsizlik seriyasına son qoymuş olacaq.

Azərbaycan çempionu bu görüşə itkilərlə çıxacaq. "Braqa" ilə pley-off mərhələsinin cavab matçında cəzalı vəziyyətə düşən müdafiəçi Elvin Cəfərquliyev və yarımmüdafiəçi Julio Romao matçı buraxacaq. Uzun müddətdir zədəli olan Kevin Medina da komandasına kömək edə bilməyəcək.

"Bayer"in baş məşqçisi Xabi Alonso isə "Qarabağ"la hər iki qrup oyununda fərqlənməyi bacaran hücumçu Viktor Bonifeys zədəli olduğu üçün onun xidmətindən yararlana bilməyəcək.

Tofiq Bəhramov adına Respublika Stadionunda keçiriləcək görüş saat 21:45-də başlayacaq. Oyunu Fransadan olan hakimlər briqadası idarə edəcək. Qarşılaşmanın baş hakimi Benoit Bastien olacaq.

UEFA Avropa Liqası: 1/8 final, ilk oyun
21:45 Qarabağ - Bayer Leverkuzen
Baş hakim: Benoit Bastien (Fransa)
Tofiq Bəhramov adına Respublika Stadionu

Heybət