"Neftçi"nin sabiq futbolçusu Keysuke Honda karyerası ilə bağlı qərar verib.

Publika.az xəbər verir ki, Kamboca millisində məşqçi kimi çalışan Honda buradan ayrıldıqdan sonra futbolçu karyerasını bərpa edib. 38 yaşlı yapon oyunçu karyerasını Butan çempionatının lideri olan "Paro"da davam etdirəcək.

Artıq tərəflər arasında müqavilə imzalanıb. Klub bu xəbəri sevinc içində açıqlayıb: "Hondanın "Paro"ya qoşulmaq qərarı Butanda futbolu təbliğ etmək öhdəliyimizə görədir. İnanırıq ki, onun iştirakı təkcə komandanı gücləndirməyəcək, həm də bütün ölkədə futbolun inkişafına katalizator rolunu oynayacaq”.

Klub Hondanı bir neçə oyunluq - AFC Çağırış Kubokunda iştirak etmək üçün çağırıb. Seçmə mərhələdə komanda "Nepalese Church Boys United" ilə qarşılaşacaq. Oyun avqustun 13-nə baş tutacaq.

Qeyd edək ki, Butan Şərqi Himalay dağlarında Hindistan və Çin arasında yerləşən kiçik bir krallıqdır. Orada futbol son dərəcə zəif inkişaf edib. Ölkənin milli komandası FİFA reytinqində 182-ci sırada qərarlaşıb.

Əlavə edək ki, Honda 2021-ci ilin martında "Neftçi"yə transfer olunub. O, cəmi 3 ay "ağ-qaralar"ın heyətində çıxış edib. Honda 7 oyunda 2 qol vurub. Eyni zamanda, paytaxt təmsilçisi həmin mövsümü çempion kimi başa vurub.

Heybət