Kiyev “Dinamo”sunun sabiq baş məşqçisi Mirça Luçesku ” Şaxtyor”da işlədiyi müddətdə gənc braziliyalıların inkişafından danışıb.

“Mənim üçün futbolçular dost idi. Tamamilə fərqli münasibətimiz var idi. Hər kəslə. Həyatımı doldururlar, çünki mənimlə keçirdikləri vaxtı xatırlayırlar. Ağıllı adamlar həmişə hər şeyi dərhal başa düşürlər. Mənimlə onlar başqa səviyyəyə keçdilər. 18-19 yaşlarında onlara çox kömək etmişəm. Bu dövrdə oğlanlar daha qapalı və utancaq olurlar.

Onların hər birində mənim hədiyyəmdən bir parça var. Biz onları böyüdə, insan olmağı öyrədə bildik. Bu mənə ən çox zövq verir. Fernandinyonun artıq 37 yaşı var və hələ də oynayır. Təqaüdə çıxmaq istəmir. O, “Atlético Paranaense”nin kapitanıdır və müstəsna səviyyədə çıxış edir. Və təkcə o deyil. Adrianonun 37, Villianın 36 yaşı var.

Eyni ilə Duqlas Kosta. Tayson PAOK-un ən yaxşı oyunçusudur”, – Luçeskunun sözlərini “Sport Total FM” sitat gətirib.

Xatırladaq ki, 78 yaşlı Luçesku Kiyev “Dinamo”sundan ayrılacağını noyabrda açıqlamışdı. O, 2020-2023-cü illərdə Kiyev komandasına rəhbərlik edib. Rumıniyalı mütəxəssis 2004-2016-cı illərdə Donetsk “Şaxtyor”unun baş məşqçisi olub. Mütəxəssis əvvəllər “Beşiktaş”, “Qalatasaray”, “Rapid”, “İnter”, “Zenit” və Türkiyə millisində də baş məşqçi vəzifəsində çalışıb.