"Barselona" "Yorqorden"in və İsveç gənclər komandasının yarımmüdafiəçisi Lukas Berqvallı transfer etməyə yaxındır.
Publika.az xəbər verir ki, bu barədə "X" sosial şəbəkəsində jurnalist Fabritsio Romano məlumat yayıb.
Onun sözlərinə görə, kataloniyalıların rəsmi təklifi bir həftə ərzində İsveç klubu tərəfindən qəbul olunacaq. "Barselona" 17 yaşlı futbolçu üçün təxminən 7 milyon avro ödəyəcək. Daha 3 milyon avro isə mümkün bonuslar kimi veriləcək.
Berqvall iyulun 1-də, yay transfer pəncərəsinin açılış günündə "Barsa"ya qoşulacaq.
Berqvall ötən ildən “Yorqorden”də çıxış edir. Bu mövsüm yarımmüdafiəçi bütün turnirlərdə 26 oyun keçirib və 2 qol vurub. Futbolçunun İsveç klubu ilə müqaviləsi 2025-ci ilin sonuna qədər qüvvədədir. Transfermarkt internet portalına görə futbolçunun təxmini dəyəri 5 milyon avrodur.
Qeyd edək ki, Azərbaycan milli komandasının üzvü Musa Qurbanlı da "Yorqorden"də çıxış edir.
Heybət
