Azərbaycanda TikTok sosial şəbəkəsində tanışının ünvanına təhqiramiz ifadələr işlədən şəxs cinayət məsuliyyətinə cəlb edilib.

Publika.az-ın əldə etdiyi məlumata görə, Ağcabədi rayon Məhkəməsinə müraciət edən rayon sakini İ. Mənsimov (şərti ad-soyad) “Kanal 21” sosial şəbəkə səhifəsində müxbir işlədiyini bildirib.

O qeyd edib ki, canlı yayım açaraq bəzi mövzular haqqında fikirlərini bildirərkən Ağdam rayon Yüzbaşı kənd sakini olan 1998-ci il təvəllüdlü Z. Nəsibov canlı yayıma qoşulub. Həmin şəxs İ. Mənsimovun anası və özü haqqında təhqiramiz ifadələr işlədib, həmçinin böhtan mahiyyətli fikirlər səsləndirib.

Daxil olan müraciət əsasında araşdırma aparılıb. Məlum olub ki, barəsində şikayət edilmiş 26 yaşlı Z. Nəsibov nazirliklərdən birinin Bərdə rayon şöbəsində işləyir. Onun İ. Mənsimovla əvvəldən tanış olması və aralarında narazılıq yaranması da müəyyən edilib.

Ağcabədi rayon Məhkəməsi Z. Nəsibovu Cinayət Məcəlləsinin 147 və 148-ci (Böhtan atma və təhqir) maddələri ilə təqsirli bilib. Ona 1200 manat cərimə cəzası tətbiq edilib.

Turqut Seyidov