Azərbaycan Respublikası Dövlət Neft Şirkətinin "Azəriqaz" İstehsalat Birliyinin Baş direktoru Ruslan Əliyevə Bakı şəhəri, Binəqədi rayonu, 7-ci mkr, S. S. Axundov küçəsi 3123-cü məhəllə ünvanında yerləşən 1 saylı çoxmənzilli binanın sakinləri tərəfindən təşəkkürnamə məktubu ünvanlanıb.
Publika.az məktubun mətnini təqdim edir:
“Bir müddət öncə yuxarıda qeyd etdiyimiz ünvanda yerləşən yaşadığımız binanın qaz təchizatında ciddi problemlər, hətta təhlükəli durumun yaranması barədə sizə “Facebook” sosial şəbəkə vasitəsilə müraciət ünvanlamışdıq. Elə həmin gün sizin tapşırığınıza əsasən qeyri-iş vaxtı olmasına baxmayaraq "Azəriqaz" İstehsal Birliyinin Bakı Regional Qazın Satışı və Bakı Regional Qaz İstismarı Departamentlərinin rəisləri Zamin Mehrəliyev və Rauf Əhmədov binamıza gəldilər. Həmin dövrdə binanın qaz təchizatı şəbəkəsində quraşdırılmış tənzimləyicinin düzgün işləməməsi nəticəsində binaya verilən qazın təzyiqində qalxmalar, enmələr müşahidə olunurdu. Yaranmış durum dəyərləndiriləndən sonra havanın soyuqluğu nəzərə alınaraq qəza xidmətinin əməkdaşları səhərədək tənzimləyicini nəzarətdə saxlayaraq binanın qaz təchizatını təmin etdilər.
Növbəti gün Bakı Regional Qaz İstismarı Departamentinin rəisi yenidən binaya gəldi və özü ilə gətirdiyi qaz tənzimləyicisini binanın qaz təchizatı xəttinə qoşdurdu. Demək olar ki, hər gün departamentin əməkdaşları bir neçə dəfə binada olaraq qaz təchizatının vəziyyəti ilə tanış olurdular. Problemlər qismən həll olunsa da, tam aradan qaldırılmamışdı. Nəhayət, 18.02.2024-cü il tarixdə istirahət günü olmasına baxmayaraq, Rauf müəllim bir neçə mütəxəssislə təkrarən binamıza gəldi, sakinlərlə söhbət edib binanın qaz təchizatında mövcud olan problemlərlə bağlı müşavirə keçirdi və bildirdi ki, sabah binanın qaz təchizatında olan problemlər əsaslı şəkildə aradan qaldırılacaq. Elə də oldu.
19.02.2024-cü ildə yaşayış kompleksimizə 2 ədəd yeni qaz tənzimləyici gətirildi və operativ şəkildə qaz təchizatı xətlərinə qoşuldu. Məqsədimiz Rauf müəllimi və yaxud "Azəriqaz" İstehsalat Birliyinin rəhbərliyini tərif xatirinə tərifləmək deyil. Sakinlərimiz sizin başçılıq etdiyiniz birliyin fəaliyyətində olan operativliyi, insanların problemlərinə qayğı ilə yanaşılmasını əyani şəkildə öz gözləri ilə gördülər. İnsanların keçirdikləri hiss və duyğuları hər hansı formada çatdırmaq çox çətindir. Lakin qeyd etmək istəyirik ki, vəzifə başında olan insanların bu cür sadəliyi, vətəndaşların qarşılaşdıqları problemlərə operativ reaksiya verməsi həqiqətən təqdirə layiqdir və bunu biz sakinlər diqqətsiz qoya bilməzdik. Rəhbərlik etdiyiniz birliyin əməkdaşlarının öz xidməti vəzifələrinin icrasına bu cür vicdanla, operativ və təmənnasız yanaşması Azərbaycan Respublikası Prezidentinin vətəndaşların müraciətlərinə diqqətlə yanaşılması barədə göstərişlərinin layiqincə yerinə yetirilməsinin bariz nümunəsidir.
Yuxarıda qeyd edilənləri nəzərə alaraq, hörmətli Ruslan müəllim, şəxsən Sizə, Rauf Əhmədova və zəhməti keçən hər bir əməkdaşınıza kompleksimizin 2000-dən çox sakini adından təşəkkürümüzü və minnətdarlığımızı bildiririk. Biz sakinlər sizin kimi məmurların bu cür davranışlarını gördükcə fəxr duyuruq, sizin kimi məmurların vacib xidmət sahələrində vəzifələrə təyin edilməsini alqışlayırıq və işlərinizdə uğurlar arzulayırıq. Allah sizləri var eləsin!
Bakı şəhəri, 7 mkr., S.S.Axundov küç. məhəllə 3123, "Union Park" Yaşayış Kompleksi, bina 1-də yaşayan sakinlərin adından:
“Binəqədi-23” MMMC-nin idarə heyətinin sədri V. M. Əliyev
Binəqədi-23” MMMC-nin idarə heyətinin üzvü,
Ağsaqqallar şurasının sədri N. K. Babayev”
