Şimali Koreyanın Müdafiə Nazirliyi ABŞ , Cənubi Koreya və Yaponiyanın bu həftə bölgədə keçirdiyi birgə dəniz təliminə cavab olaraq "Haeil-5-23" sualtı nüvə silah sisteminin sınaqdan keçirildiyini açıqlayıb .

Publika.az xəbər verir ki, Şimali Koreya ordusunun ABŞ və müttəfiqlərinin hərbi manevrlərinin qarşısını almağa davam edəcəyi vurğulanıb:

“Biz ABŞ-ı və onun havadarlarını ilin əvvəlindən davam edən və Şimali Koreyanın təhlükəsizliyini ciddi şəkildə təhdid edən ehtiyatsız hərəkətlərinə görə qətiyyətlə qınayırıq və bu hərəkətlərin gətirəcəyi fəlakətli nəticələr barədə qətiyyətlə xəbərdarlıq edirik”.

Cənubi Koreya Baş Qərargahının verdiyi açıqlamada ABŞ, Cənubi Koreya və Yaponiyanın Koreya yarımadasının cənubundakı sularda ortaq dəniz təlimi keçirdiyi bildirilib. Təlimin Şimali Koreyaya qarşı birgə çəkindirmə və müdaxilə imkanlarını gücləndirmək məqsədi daşıdığı vurğulanıb. Həmçinin bildirilib ki, təlimdə dəniz təhlükəsizliyi təhdidləri, o cümlədən kütləvi qırğın silahlarının daşınması məsələsi müzakirə olunub.

Qeyd olunub ki, tərəflər hərbi təlimləri müntəzəm, daha sistemli və səmərəli keçirməyi hədəfləyiblər. Sonuncu təlim bu kontekstdə həyata keçirilən ilk üçtərəfli təlim kimi qeydə alınıb.

Roza Şəfiyeva