Dəbdəbəli toyu ilə dünya mətbuatında gündəmdən düşməyən məşhur hindistanlı milyarderin oğlu Anant Ambaninə verilən toy hədiyyələrinin siyahısı açıqlanıb.

Publika.az xəbər verir ki, Mumbayda keçirilən üç günlük möhtəşəm toyda dünyanın hər yerindən 14 min qonaq iştirak edib.

Anant Ambani və Radhika Merchant ən dəyərli hədiyyəni bəyin valideyinlərindən alıb. Cütlüyə Dubaydakı “Palm Jumeirah”da dəyəri 80 milyon dollardan artıq 10 yataq otağı və şəxsi çimərliyi olan malikanə hədiyyə olunub. Malikanədən əlavə Ananta valideynləri yarım milyon dollar dəyərində "Bentley Continental GTC Speed" ​​​​avtomobili hədiyyə edib. Gəlinə isə 2,5 milyon dollardan çox dəyərində "Cartier" broşu və 12 milyon dollar dəyərində mirvari və xüsusi sifarişlə hazırlanan brilyant boyunbağı hədiyyə olunub.

Cütlüyün toy hədiyyələri arasında qonaqların ənamları da diqqətdən qaçmayıb. Amerikalı peşəkar güləşçi, bodibilder, repçi və aktyor Con Sina yeni evlənənlərə “Lamborghini” hədiyyə edib.

Dünyanın ən varlı iş adamı, “Amazon”un sahibi Ceff Bezos “Bugatti”, "Facebook"un baş direktoru Mark Zukerberq cütlüyə şəxsi təyyarə bağışlayıb.

"Microsoft"un qurucusu Bill Qeyts bəy və gəlinə yaxta, İvanka Tramp ABŞ-da yeni tikilidən daşınmaz əmlak, Bollivud ulduzu Şahrux Xan isə Fransada mənzil bağışlayıb. Amitabh Baççan ailəsinin toy hədiyyəsi isə 3 milyon dollar dəyərində incə zümrüd boyunbağı olub.

Bundan əlavə, cütlüyə “Mercedes” , “Rolls-Royce”, helikopter və digər bahalı hədiyyələr də bağışlanıb.

Cəmilə