Cənubi Qafqaz regionunda sabitlik NATO üçün vacibdir.

Publika.az xəbər verir ki, bunu NATO baş katibinin Qafqaz və Mərkəzi Asiya üzrə xüsusi nümayəndəsi Xavyer Kolomina bildirib.

O, alyansın İrəvan və Bakı arasında ABŞ və Aİ-nin iştirakı ilə sülh prosesinə dəstəyini ifadə edib.

“Biz Ermənistanla Azərbaycan arasında münasibətlərin normallaşması prosesini, sülhün bərqərar olmasına və onlar arasında uzunmüddətli sülh sazişinin bağlanmasına yönəlmiş danışıqları qətiyyətlə dəstəkləyirik. Biz tərəfdaşlarımızı düzgün istiqamətə aparmağa çalışırıq. Bizim üçün isə düzgün yol münasibətləri tənzimləməkdir, çünki bu, Qafqazda sabitlik gətirəcək”, - Kolomina bildirib.

O qeyd edib ki, Qafqaz Qara dəniz regionuna birbaşa təsir edir və Qara dəniz NATO-nun strateji maraqlarına daxil olan regiondur: "Deməli, regionda sabitliyin olması bizim marağımızdır, çünki qeyri-sabitlik bizə təsir edir".

Kolomina Ermənistan-Azərbaycan sülh prosesində müsbət irəliləyişə nikbin olduğunu bildirib və dövlət katibi Blinkenin vasitəçiliyi ilə Vaşinqtonda keçirilən üçtərəfli görüşü xüsusilə qeyd edib.

“İrəliləyiş olduğuna inanıram. Bunun bizi hara aparacağını bilmirəm, lakin bu prosesi bacardıqca dəstəkləməyə davam edəcəyik”, - NATO baş katibinin xüsusi nümayəndəsi vurğulayıb.

Cəmilə