İranda keçirilən növbədənkənar prezident seçkilərində dünyanın müxtəlif ölkələrində yaşayan İran vətəndaşlarının səs verməsi üçün seçki məntəqələri açılıb.

Publika.az bu barədə "Tehran Times"a istinadən xəbər verir.

Cənubi Koreya, Yaponiya, Türkiyə, Küveyt, BƏƏ, Səudiyyə Ərəbistanı, Böyük Britaniya, Fransa, Almaniya və Yunanıstan da daxil olmaqla onlarla ölkədə seçki məntəqələri seçicilərin ixtiyarına verilib.

İlk olaraq Yeni Zelandiya və Avstraliyada, daha sonra Asiya, Avropa və Afrikadakı iranlılar saat qurşaqları fərqini nəzərə alaraq səs veriblər.

Tehranla münasibətləri gərgin olan Kanada isə öz ərazisində yaşayan iranlıların səs verməsinə icazə verməyib. Səsvermə hüququ olan iranlı seçicilərə ABŞ-Kanada sərhədində yerləşən seçki məntəqələrinə getmələri tövsiyə olunub.

“İnsan haqları müdafiəçisi roluna iddialı olan Kanada bu prosesə mane olan yeganə ölkə olub. Bu, açıq şəkildə 100 mindən çox iranlı seçicinin seçkilərdə iştirakına mane oldu”, - İranın xarici işlər naziri vəzifəsini icra edən Əli Bakeri Kani bildirib.

Qərb ölkələrində səs verməyə çalışan iranlı seçicilərə qarşı bir neçə təqib və zorakılıq halları barədə məlumatlar var. İnternetdə separatçı və ya monarxist qruplarla əlaqəsi olduğu güman edilən insanların seçki məntəqələrinin yaxınlığında bayraqlar dalğalandırdığı və seçiciləri təhqir etdiyinə dair məlumatlar yayılır.

Adəm Abbaslı