“Prezident İlham Əliyev yerli televiziya kanallarına müsahibəsi zamanı bir sıra mühüm məqamlara toxunub. Eyni zamanda sülh gündəliyi ilə bağlı fikirlərini də bölüşüb. Cənubi Qafqazda davamlı inkişaf və əməkdaşlıqla bağlı Azərbaycanın gündəliyi kifayət qədər açıqdır və burada gizli heç nə yoxdur. Çünki 5 maddəlik prinsip məsələsində bütün münasibətlər tənzimlənməlidir.”

Bu sözləri Publika.az-a açıqlamasında politoloq İlyas Hüseynov deyib.

O, həmçinin bildirib ki, 5 maddəlik prinsip müharibədə qalib gələn Azərbaycanın təşəbbüsüdür:

“Bu gün Ermənistan nə qədər sülhdən danışsa da, sülhün imzalanması niyyətini ifadə etsə də, bir sıra məsələlər hələ də öz həllini tapmayıb. Hələ də Ermənistan öz üzərinə götürdüyü öhdəlikləri yerinə yetirməyib. Naxçıvan Muxtar Respublikası ilə əlaqə təmin olunmur. Bu bağlantının təmin olunmaması həm də iqtisadi itkilər deməkdir. Geopolitik yaxınlaşmanı bir qədər də çətinləşdirən elementdir. Ermənistanın aqressiv düşüncəsinin məhsuludur. Bir sıra texniki məsələlərin həll olunması və siyasi iradənin nümayiş olunması önəmlidir.

Çünki 10 noyabr 2020-ci ildə imzalanan üçtərəfli bəyənatın 9-cu maddəsi bunu deyir və Ermənistanın baş naziri üzərinə öhdəliklər götürür. Prezident eyni zamanda Zəngəzur dəhlizinin işləmə prinsipləri və mexanizmləri ilə bağlı məsələlərə toxunub. Ermənistan rəhbərliyi bu fikirlərə ciddi yanaşmalı və yerinə yetirməlidir, bu məsələlər tezliklə öz həllini tapmalıdır”.

Roza Şəfiyeva