Mayın 15-də keçirilən hökumətin iclasında Ermənistan Respublikasında hərbi təlimlərdən yayınmaya görə məsuliyyətin müəyyən edilməsi barədə qərar qəbul edilib.

Qutb.az xəbər verir ki, təşəbbüsü Ermənistan Müdafiə Nazirliyi təqdim edib. Qanun layihəsi yaxın vaxtlarda parlamentin gündəliyinə daxil ediləcək və ona müvafiq düzəlişlər olunacaq.

Layihənin əsaslandırmasında bildirilir ki, praktikada vətəndaşların müxtəlif yollarla hərbi səfərbərlik təlimlərində iştirakdan yayınmağa cəhd göstərdiyi çoxsaylı hallar artıq qeydə alınıb.

Bu cür təcrübələrə qəsdən özünə zərər vermə, saxta xəstəlik, sənədlərin saxtalaşdırılması və digər aldatma formaları daxildir.

Müdafiə Nazirliyi hesab edir ki, bu cür davranışın qarşısını almaq üçün qanunla ciddi sanksiyalar müəyyən edilməlidir. Təklif olunan dəyişikliyə əsasən, ciddi səbəb olmadan hərbi təlimlərdən yayınma əmək haqqının 20 mislinə qədər miqdarda inzibati cərimə və ya 2 aydan 3 ilədək müddətə azadlıqdan məhrum etmə ilə cəzalandırılacaq.