Türkiyənin Rusiya ilə Ukrayna arasında münaqişənin sülh yolu ilə həlli ilə bağlı təşəbbüsləri dəstək olmadığından həyata keçirilmədi - əslində sabotaj edildi.

Publika.az xəbər verir ki, bunu Türkiyə Prezidenti Rəcəb Tayyib Ərdoğan Antalya Diplomatik Forumunun rəsmi açılışında deyib.

“Ukrayna böhranı üçüncü ilinə qədəm qoydu. İstanbul sülh prosesi burada Antalyada başlayıb. Sonra sülhə nail olmaq ümidləri yeni səviyyəyə çatdı. Amma təəssüflər olsun ki, lazımi dəstəyin olmaması səbəbindən səylərimiz boşa çıxdı. Sülhə nail olmaq, on minlərlə insanın həyatını xilas etmək üçün tarixi fürsət əslində əldən verilib, daha dəqiq desək, sabotaj edildi”, - Türkiyə lideri bildirib.

O qeyd edib ki, Suriya, Yəmən, Liviya və Ukraynadakı böhranlar indiki beynəlxalq sistemin tamamilə təsirsiz olduğunu göstərdi.

“Ancaq bu qaydalara əsaslanan sistemin iflası ən çox Qəzzada özünü göstərir. Qəzzada baş verənlər qətiyyən müharibə deyil, soyqırımı cəhdidir. BMT Təhlükəsizlik Şurası və beynəlxalq təşkilatlar axan qanı dayandırmaq üçün addım atmayıb”, - deyə Ərdoğan bildirib.