Qazaxıstanın Almatı şəhərində böyük ərazili anbarda yanğın başlayıb.
Publika.az Trend-ə istinadən bildirir ki, yanğının ərazisi təxminən 3 min kvadrat metri əhatə edir.
Almatı Şəhər Fövqəladə Hallar İdarəsindən bildirilib ki, hazırda yanğının söndürülməsi istiqamətində işlər davam etdirilir. Hadisə yerinə 70-dən çox yanğınsöndürən və 20-yə yaxın texnika cəlb edilib.
Yanğınla əlaqədar şəhərdə operativ qərargah da yaradılıb.
Qeyd edilib ki, yanğın baş verən ərazidə partlayış təhlükəsi olan qaz balonları var. Bu isə yanğının söndürülməsini çətinləşdirir.
