Salyan rayon sakini Elvin Həşimov (soyad şərtidir) polisə müraciət edərək tanış olduğu qadın tərəfindən şantaj edildiyini bildirib.

Publika.az-ın əldə etdiyi məlumata görə, şikayətçi qeyd edib ki, sevgi münasibətində olduğu Elvira adlı qadın onu çılpaq görüntülərini yaymaqla hədələyib və 350 manat alıb. Hədələrin davam etməsindən ehtiyat edən şəxs polisdən həmin qadının məsuliyyətə cəlb edilməsini xahiş edib.

Faktla bağlı Salyan Rayon Polis Şöbəsində Cinayət Məcəlləsinin 182.1-ci (Hədə-qorxu ilə tələb etmə) maddəsi ilə cinayət işi açılıb. Araşdırmalar zamanı məlum olub ki, kişini şantaj edən qadın paytaxtdakı məşhur brend mağazalarından birində çalışır. O, Elvinin rayonda tanınmış və nüfuzlu şəxs olmasından istifadə edərək qarşı tərəfən pul almaq qərarına gəlib. Həmçinin Elviranın boşandığı və iki oğlu ilə birgə yaşadığı bildirilib.

Toplanmış materiallar Salyan Rayon Məhkəməsinə göndərilib. Məhkəmənin ötən həftə çıxardığı hökmlə Elvira Həmzəyevaya 3 il azadlıqdan məhrumetmə cəzası verilib. Lakin onun cəzası 2 il sınaq müddəti təyin edilməklə şərti hesab edilib.

Turqut Seyidov