“Əminəm ki, Azərbaycan sentyabrın 1-də keçiriləcək Milli Məclisə seçkilərdə növbəti demokratiya nümunəsi sərgiləyəcək”.

QÜTB.AZ xəbər verir ki, bunu “Seçki 2024” Müstəqil Media Mərkəzinə açıqlamasında türk ekspert Kürşat Atılqan deyib.

K.Atılqan qeyd edib ki, Azərbaycanda demokratik ənənələr inkişaf edir: “Azərbaycan müstəqilliyini bərpa edəndən sonra demokratik inkişaf yolunda uzun məsafə qət edib. Bu dövrdə keçirilən bütün seçkilərin beynəlxalq standartlara uyğun baş tutması istiqamətində mühüm işlər görülüb və zəngin seçki təcrübə formalaşıb. Bu təcrübə sentyabrın 1-də keçiriləcək parlament seçkilərinin beynəlxalq standartlara uyğun, şəffaf şəkildə baş tutacağını və demokratiya nümunəsi olacağını deməyə əsas verir”.

Türk ekspert Milli Məclisə seçkilərin azad olunmuş ərazilərdə də keçirilməsini mühüm tarixi hadisə adlandırıb. Çünki bu seçkilərdə azad olunmuş ərazilərə qayıdan insanlar qanunverici orqana təmsilçilərini öz doğma yurdlarında səsvermə hüququndan istifadə etməklə seçəcəklər.

“Bu, seçki hüququnun Azərbaycanın bütün ərazisində təmin edilməsi və azad olunmuş torpaqlara qayıdış prosesinin uğurla davam etdirildiyinin nümunəsidir. Qardaş Azərbaycana uğurlar arzulayırıq”, - K.Atılqan bildirib.