Avropa İttifaqı (Aİ) ABŞ-ın keçmiş lideri Donald Trampın yenidən prezident seçiləcəyi təqdirdə Vaşinqtonla ticarətin yaxşılaşdırılmasına dair danışıqlar uğursuz olarsa, Amerika idxalına yüksək rüsumların tətbiqi imkanını özündə ehtiva edən ticarət strategiyası hazırlayır.

Publika.az xəbər verir ki, bu barədə “Financial Times” yazıb.

“Brüssel Donald Trampın yenidən prezident seçilmə ehtimalını nəzərə alaraq iki mərhələli ticarət strategiyası hazırlayır. Respublikaçıya tez razılaşma təklif ediləcək. Amma o, cəza tariflərini seçərsə, məqsədyönlü cavab olacaq”, - deyə nəşr qeyd edib.

Qəzetin yazdığına görə, Trampla danışıqların seçkilərdə qalib gələcəyi təqdirdə, rəsmi olaraq vəzifəyə başlamazdan əvvəl başlanması planlaşdırılır. Aİ nümayəndələri onunla blokun böyük miqdarda ala biləcəyi ABŞ məhsullarının mümkün siyahısını müzakirə etmək istəyirlər.

“Financial Times” iddia edir ki, ticarətin yaxşılaşdırılması üzrə danışıqlar uğursuz olarsa və Tramp daha yüksək tariflər tətbiq edərsə, Avropa Komissiyasının ticarət idarəsi 50% (məhsulun dəyəri) və ya daha çox tarifə məruz qala biləcək idxal siyahılarını tərtib edəcək.

Adəm Abbaslı