Almaniyada milyonlarla əcnəbini zorla deportasiya etmək üçün ifrat sağçı planların ortaya çıxması insanlara milli sosializm dövrünü xatırladıb. Onlar bunun təkrarlanmasından narahat olaraq küçələrə axışıblar.

Publika.az xəbər verir ki, 2023-cü ilin noyabrında aralarında ifrat sağçı və populist olan Almaniya üçün Alternativ (AfD) Partiyasının üzvləri, Avstriyadakı “İdentitar Hərəkat”ın keçmiş lideri Martin Sellner və başqa ifrat sağçı fəallar Potsdam şəhərindəki villalardan birində toplantı keçirib.

Görüşdə sığınacaq axtaranların, ölkədə qalmaq hüququ olan əcnəbilərin və Avropa mədəniyyətini qəbul etməyən Almaniya vətəndaşlarının sistemli şəkildə deportasiyası planları müzakirə edilib.

Bu, 1933-cü ildə hakimiyyətə gələn nasional-sosialist rejimin yəhudilərə qarşı tətbiq etdiyi qanunları xatırladıb.

Hitlerin başçılıq etdiyi rejimin qəbul etdiyi həmin qanunlar yəhudilərin dövlət orqanlarından uzaqlaşdırılması, universitetlərə qəbulun qadağan edilməsi, pasportların ləğvi, iş yerlərinin açılmasına qadağa kimi bir sıra qaydaları ehtiva edib.

Roza Şəfiyeva