Rumıniyanın "Universitatea 1948" klubuna maraqlı təyinat reallaşıb.

Publika.az xəbər verir ki, "tələbələr" baş məşqçisini dəyişmək qərarına gəlib. Yeni çalışdırıcı karyerasında 9-cu dəfə komandaya rəhbərlik edəcək Nikolo Napolidir.

29 turdan sonra sonra "Universitatea 1948" turnir cədvəlinin 13-cü pilləsində qərarlaşıb. Qeyri-qənaətbəxş nəticələr klub rəhbərliyinin məşqçini dəyişmək qərarına gəlməsinə səbəb olub. Covanni Kostantino postu ilə vidalaşıb. İtalyan 2023-cü ilin oktyabrından Krayova təmsilçisində çalışmağa başlayıb və 18 matçda komandaya rəhbərlik edib.

Rəhbərlik onlara yaxşı tanış olan 62 yaşlı Nikolonu baş məşqqçi təyin ediblər. O, karyerasında 9-cu dəfə bu komanda ilə çalışacaq. Əvvəlki əməkdaşlıqların hamısı erkən ayrılıqla başa çatıb.

Napoli Rumıniya klubuna ilk dəfə 2003-cü ildə təyinat alıb. İtalyan məşqçi üç görüşdə iş başında olub. "Universitatea 1948"ə ikinci qayıdışı 2007-ci ildə reallaşıb. Ancaq budəfəki macəra təxminən iki il davam edib. Bundan sonra Nikolo və klub rəhbərliyi arasında dərin bağlar yaranıb. Komandanın başı dərdə düşən kimi ona müraciət etmək aludəçiliyi yaranıb. Napoli 2011, 2013, 2018, 2020 və 2022-ci illərdə də komandaya baş məşqçi təyin olunub.

Qeyd edək ki, "Universitatea 1948" italyan məşqçinin rəhbərliyi altında martın 10-da ilk matçına çıxacaq.

Heybət