Nyu-York polisi Donald Trampa məxsus "Trump International Hotel & Tower" göydələninə yaxınlaşmaqda maneələr yaradıb.

QÜTB.AZ xəbər verir ki, bu barədə TASS məlumat yayıb.

Qeyd edilib ki, binanın ətrafında beton bloklar və metal baryerlər quraşdırılıb, qonşu küçə bağlanıb. Polis binaya piyadaların girməsinə, onun yaxınlığında nəqliyyat vasitələrinin dayanmasına icazə vermir.

Hadisə yerində bir neçə polis patrul xidməti fəaliyyət göstərir, xəbərin dərc olunduğu vaxtda vəziyyət sakitdir.

Xatırladaq ki, yanvarın 1-də Las-Veqasda "Trump International Hotel & Tower"in yaxınlığında "Tesla Cybertruck" avtomobili partladılıb. Hadisə nəticəsində bir nəfər ağır yaralanıb, həkimlər onu xilas edə bilməyiblər.

"Tesla"nın qurucusu və baş direktoru İlon Mask bildirib ki, elektrikli avtomobilin partlaması terror aktı nəticəsində baş verə bilər.

Hüseyn İbadlı