İran Xarici İşlər Nazirliyinin (XİN) sözçüsü Nasir Kənani ABŞ və Fransa prezidentlərinin birgə bəyanatını tənqid edərək, mətndə Tehrana qarşı irəli sürülən “əsassız və qəbuledilməz ittihamları” rədd edib.

Publika.az xəbər verir ki, bu barədə İran XİN-in bəyanatında qeyd olunur.

Kənani anti-İran bəyanatını əsassız və siyasi məqsədlər güdən adlandırıb.

O vurğulayıb ki, regionda və dünyada sabitliyin bərqərar olması, beynəlxalq təhlükəsizliyin möhkəmləndirilməsi üçün terrorçu qruplarla mübarizədə İranın rolu əvəzsizdir.

Bundan əlavə, o, Tehranın “beynəlxalq hüquq və öhdəliklər çərçivəsində MAQATE ilə texniki əməkdaşlığa” sadiqliyini təsdiqləyib.

Xatırladaq ki, bundan əvvəl Fransa prezidenti Emmanuel Makron ABŞ prezidenti Co Baydenlə Yelisey sarayında danışıqlardan sonra keçirilən birgə mətbuat konfransında Paris və Vaşinqtonun İranı “regionda sabitliyi pozmağa” son qoymağa məcbur etmək üçün ona təzyiq etmək niyyətində olduğunu bildirmişdi.

Adəm Abbaslı