Heyvanların insanlarda qorxu iyini hiss edib-etməməsi uzun müddətdir müzakirə olunur. Tədqiqatçılar heyvanların, o cümlədən atlar və itlərin müxtəlif qoxulara necə reaksiya verdiyini müşahidə ediblər.

Publika.az xəbər verir ki, “Scientific Reports” jurnalında atlarla bağlı dərc olunan araşdırmada tədqiqatçılar iştirakçılardan bir gün komediya filminin, digər gün isə qorxu filminin kliplərinə baxmağı xahiş ediblər.

İştirakçılar hər bir videoya baxdıqdan sonra, tədqiqatçılar pambıq yastıqcıqlar vasitəsilə tamaşaçıların qol altlarından tər nümunələri götürüblər. İştirakçıların hər birindən videoya baxarkən nə qədər sevinc və ya qorxu hiss etdiklərini bölüşməyi istəyiblər. Tədqiqatçılar daha sonra xoşbəxtlik və kədər zamanı insanların çıxardığı qoxuları bir-birindən ayırd edə bilmək üçün ata eyni adamdan iki tampon nümunəsi təqdim ediblər.

Məlum olub ki, atlar onlara hansı növ pambığın verilməsindən asılı olaraq fərqli reaksiya göstəriblər.

“Atlar sevinc nümunələrini iyləyəndə yalnız sol burun dəliklərindən istifadə edirdilər. Bu, qoxunu analiz etmək üçün beynin hansı hissəsindən istifadə etdiklərini göstərir. "Bütün məməlilərdə beynin iki yarımkürəsi müxtəlif funksiyaları yerinə yetirir və emosional kontekstdə sevinc nümunələrindən gələn qoxunun atlar tərəfindən müsbət qəbul edildiyi görünür", - deyə alimlər izah ediblər.

Atlara qorxu filminə baxarkən insanlardan götürülən nümunələr verildikdə, heyvanlar tamamilə fərqli reaksiya göstəriblər və qoxunu almaq üçün "hər iki burun dəliyindən istifadə ediblər".

Tədqiqatçılar, atların reaksiyalarının arxasında başqa bir heyvanın davranışına təsir edə bilən heyvanlar tərəfindən istehsal olunan kimyəvi siqnalların ola biləcəyini düşünürlər. İnsanlarda tərin tərkibində adrenalin və ya androstadienon (feromona bənzər zülal) kimi qorxu anlarında qoxu dəyişikliyinə səbəb ola biləcək bir neçə birləşmə var. Alimlər yazıblar ki, bu birləşmələr həm də bir növdən digərinə “emosional məlumat” ötürə bilər.

Cəmilə