Soltan Yol

Həqiqət – insanın, həyatın, dünyanın mahiyyətinin dərkidir. Bu baxımdan həqiqət idrak hadisəsidir. 
*
İnsan səviyyəsində həqiqət axtarışı – insan mahiyyətinin dərkidir. 
*
Həyat səviyyəsində həqiqət axtarışı – həyatın mahiyyətinin dərkidir. 
*
Dünya səviyyəsində həqiqət axtarışı – dünyanın mahiyyətinin dərkidir. 
*
İnsanın, həyatın, dünyanın mahiyyəti birdir, ona görə həqiqət birdir. 
*
Həqiqət axtarışı – insanilik axtarışıdır: yalnız insanilik axtaran üçün həqiqət var. 
*
Özünü, mahiyyətini dərk etmiş insan həqiqətli insandır.
*
Həqiqət sevgisi, vurğunluğu – insanlıq sevgisi, vurğunluğudur. 
*
Həqiqətə qovuşmaq, çatmaq – insanlığa qovuşmaq, çatmaqdır. 
*
Həqiqəti ortaya çıxarmaq – insanlığı ortaya çıxarmaqdır. 
*
Həqiqətin qalib gəlməsi – insanlığın qalib gəlməsidir. 
*
Həqiqət uğrunda ölmək – insanlıq uğrunda ölməkdir. 
*
Həqiqətdən keçməmək – insanlıqdan keçməməkdir. 
*
Həqiqətin şirinliyi – insanlığın aliliyidir. 
*
Həqiqətin acılığı – insanın barışmazlığıdır. 
*
Hər bir insanda həqiqətə çatmaq imkanı var, çünki hər bir insanda insanilik imkanı var. 
*
İnsanlaşan – həqiqətləşir. 
Həqiqətləşən – aydınlanır. 
Aydınlanan – cəfəngiyyatdan qurtulur. 

22.02.2025.