Fransada fermerlər hökumətin kənd təsərrüfatı siyasətinə etiraz olaraq Paris ətrafındakı magistral yolları bağlayaraq şəhəri mühasirəyə alıblar.

Publika.az xəbər verir ki, Avropanın bir çox ölkəsində fermerlər etirazlarını davam etdirirlər. Fermerlər Paris ətrafındakı A10, A13, A4 və A6 avtomobil yolları da daxil olmaqla 8 nöqtədə traktorlarla yolları bağlayıb, bəzi yollarda isə ot bağlamaları ilə barrikada qurublar.

Fermerlər traktorlarının üzərinə “Qəzəbli əkinçi”, “Gənc yaşlarımda xəyal qururdum, amma bu gün ölürəm”, “Səssiz ölməyəcəyik”, "Bu, əkinçilik üçün son döyüşdür. Bu, sağ qalmaq məsələsidir" yazılı plakatlar asıblar.

Hökumət fermerlərin etirazına görə 15 min polis və jandarm səfərbər edib. Fransanın daxili işlər naziri Gerald Darmanin təhlükəsizlik qüvvələrini etirazlar qarşısında təmkinli olmağa çağırıb və fermerlərə strateji nöqtələrə müdaxilə etməmək barədə xəbərdarlıq edib:

"Biz dövlət binalarının, vergi idarələrinin, supermarketlərin zədələnməsinə və ya xarici məhsullar daşıyan yük maşınlarının dayandırılmasına icazə verməyəcəyik".

Fermerlər Braziliya və Argentinadan daha çox mal əti idxalına icazə verən yeni AB razılaşmasına qarşı da çıxıblar.

Fermerlər istehsal xərclərinin artması qarşısında ekoloji qaydalar və haqsız rəqabət arasında ilişib qaldıqlarını bildirirlər.

Roza Şəfiyeva