ABŞ-ın ən böyük beyin mərkəzi sayılan Atlantik Şurasında keçirilən mühüm iclasda Türkiyənin müdafiə sənayesi yüksək qiymətləndirilib.

Publika.az xəbər verir ki, iclasda Türkiyənin xüsusilə pilotsuz döyüş maşınları, süni intellekt və robotlaşdırılmış döyüş sənayesi sahəsində qabaqcıl ölkələr sırasında olduğu vurğulanıb.

Həmçinin Türkiyənin fəal iştirak etdiyi İHA və PUA texnologiyalarının müasir müharibələrdə qalib gəlmək üçün əsas əhəmiyyət daşıdığı da qeyd olunub: “Türkiyə təkcə İHA və PUA texnologiyalarında deyil, həm də döyüş meydanında sınaqdan keçirilmiş və uğur qazanmış doktrinalarda lider mövqe tutur".

Eyni zamanda bu texnologiyaların NATO üzvü olan ölkələrə inteqrasiyasının vacibliyi də bildirilib. Uğurlu inteqrasiya modelinə nümunə kimi Türkiyə-Azərbaycan hərbi tərəfdaşlığı göstərilib.

Türkiyə Xarici İşlər Nazirliyinin NATO müdafiə və Avro-atlantik təhlükəsizlik məsələləri üzrə baş direktorunun müavini Volkan Öskiper Türkiyə-Azərbaycan münasibətlərini müdafiə sektorlarının tam inteqrasiyasında "nümunəvi” adlandırıb.

O, iştirakçılara iki qardaş ölkə haqqında məlumatlar verib: “Türkiyə-Azərbaycan müdafiə əlaqələri 1992-ci ildə başlayıb. Üç-dörd ildən bir yenilənən bu münasibətlərin dinamikası onu həmişə müasir dövrün şərtlərinə uyğunlaşdırmaqdır. 1992-ci ildə Azərbaycan ordusu ilə birgə təlimlə başlayan proses indi qabaqcıl döyüş texnologiyalarına çevrilib. Azərbaycan ordusu NATO standartlarında ordudur”.

Roza Şəfiyeva