Bu gün Azərbaycanda prezident seçkiləri keçirilir.

Publika.az-a xəbər verir ki, səhər tezdən 15 saylı Yasamal 1-ci seçki dairəsinin 14 saylı məntəqəsinə də seçici axını başlayıb. Seçki komissiyasının sədri Elşən Nəcəfov saytımıza bildirib ki, məntəqədə ümumi siyahı üzrə 1370 seçici var:

“Ümumilikdə isə 26 qeydiyyatdan çıxma var. Artıq 70 nəfər səs verib. Hazırda da seçicilər gəlir. Daşınan qutu istifadə olunmayıb. Aktivlik hiss olunur”.

69 yaşlı seçici Nurməmməd Rəhimov 14 saylı məntəqədə səs verib:

“Səsimi verdim. İnanıram ki, bu səs gələcəyimiz üçün faydalı olacaq”.

Qeyd edək ki, ölkədə 6 milyon 478 min 623 seçicinin səs verməsi üçün 6319 daimi və 218 müvəqqəti olmaqla 6537 seçki məntəqəsi formalaşdırılıb.

Prezident seçkiləri ilə əlaqədar 23 mindən artıq Azərbaycan vətəndaşının səs verməsi üçün 37 ölkədəki səfirlik və konsulluqlarda 49 seçki məntəqəsi yaradılıb.

Səsvermə saat 08:00-da başlayıb, saat 19:00-da başa çatacaq.

Aysel Şahmar