Son tədqiqatlar döymə mürəkkəbinin insan sağlamlığına uzunmüddətli təsir göstərdiyini bildirir. Araşdırma döymələrin limfa düyünlərində toplanaraq xərçəng riskini artıra biləcəyini ortaya qoyub.

Qutb.az xəbər verir ki, tədqiqatçılar 5900-dən çox Danimarka əkizinin məlumatlarını təhlil edərək döyməsi olan şəxslərdə dəri və limfoma xərçənginə daha tez-tez rast gəlindiyini aşkarlayıblar. Xüsusilə, iri döymələri olan insanlarda limfoma riski üç dəfə yüksək olub. Bunun əsas səbəbinin mürəkkəb hissəciklərinin limfa düyünlərində toplanması və immun sisteminə təsir etməsi olduğu ehtimal edilir.

Mütəxəssislər bildirirlər ki, müəyyən mürəkkəb rəngləri potensial təhlükəli maddələr ehtiva edə bilər. Lakin bu əlaqəni tam başa düşmək üçün əlavə tədqiqatlara ehtiyac var. Növbəti mərhələdə alimlər mürəkkəb hissəciklərinin limfa düyünlərinə molekulyar səviyyədə təsirini araşdırmağı planlaşdırırlar.

Araşdırma “BMC Public Health” jurnalında dərc edilib.