Əfsanəvi argentinalı futbolçu Dieqo Maradonanın kiçik oğlu atasının qəsdən öldürüldüyünü iddia edib.

Publika.az xəbər verir ki, onun sözlərinə görə, idman əfsanəsini xilas etmək olarmış.

“Atamı öldürdülər. Bunu kimin etdiyini deyə bilmərəm, bu barədə fikirlərim var, amma ifadə edə bilmirəm. Onu taleyin ixtiyarına buraxdılar, halbuki nəsə etmək olardı”, – kiçik Maradona “Marca”ya müsahibəsində bildirib.

Nəşrin həmsöhbəti futbolçunun ölümünün səbəbləri ilə bağlı açıq araşdırmanın hələ də davam etdiyini xatırladıb. O, idmançının övladlarının Argentina ədalətinə inanmağa davam etdiyini bildirib.

1986-cı ilin dünya çempionu 25 noyabr 2020-ci ildə vəfat edib. 60 yaşlı idmançı və məşqçinin ölüm səbəbi kəskin ürək çatışmazlığından yaranan ağciyər ödemidir. Əfsanəvi argentinalının yaxınlarının dediyinə görə, faciə həkimlərin günahı ucbatından baş verib və onlar Maradonanı sözün əsl mənasında ölümə buraxıblar. Lakin həkimlər özləri bu fərziyyəni inkar edirlər.