Bakıda model sevgilisi Raziyyat Əliyevanı (Razi) döyməklə gündəmə gələn iş adamı, hazırda həbsdə olan Ziya Hüseynzadənin ittihamı ağırlaşdırılıb.
Qütb.az qafqazinfo-ya istinadən xəbər verir ki, Z.Hüseynzadəyə qarşı Cinayət Məcəlləsinin ümumilikdə 7 maddəsi üzrə ittiham elan edilib.
Belə ki, Bakı Ağır Cinayətlər Məhkəməsində keçiriləcək məhkəmə prosesində Z.Hüseynzadə məcəllənin 127.2.2 (Qəsdən sağlamlığa az ağır zərər vurma-xüsusi amansızlıqla, o cümlədən zərərçəkənə ağır iztirablar verməklə), 133.2.6 (Əzab vermə-işgəncə ilə törədildikdə), 134 (Öldürməklə və ya sağlamlığa ağır zərər vurmaqla hədələmə), 177.3.2 (Oğurluq-külli miqdarda ziyan vurmaqla), 182.3.2 (Hədə-qorxu ilə tələb etmə - külli miqdarda əmlak əldə etmək məqsədi ilə), 186.2.1 (Əmlakı qəsdən məhv etmə-zərərçəkmiş şəxsə külli miqdarda ziyan vurmaqla) və 221.1-ci (Xuliqanlıq) maddələri ilə təqsirləndiriləcək.
Cinayət işi üzrə 3 nəfər zərərçəkmiş şəxs qismində tanınıb. Bunlar Raziyyat Əliyeva ilə yanaşı, onun anası və daha bir qadındır.
İttihamda qeyd edilib ki, Z.Hüseynzadə R.Əliyeva ilə münasibətlərinin pozulmasından sonra onu dəfələrlə döyərək xəsarətlər yetirib. Yaşadığı evdə başını ardıcıl olaraq döşəməyə çırparaq işgəncə verib. Həmçinin yaşadığı 13-cü mərtəbədəki mənzilin pəncərəsinin qarşısına gətirərək onu yerə atmaqla hədələyib.
Bundan başqa Ziya Hüseynzadə Raziyyat Əliyevaya məxsus olan 185 000 manat dəyərindəki “Mercedes” markalı avtomobili təhvil verməsini hədə-qorxu ilə tələb edib. Modelin Türkiyəyə getməsindən sonra isə həmin avtomobilin yerini müəyyən edərək evakuatorla yaşadığı bağ evinə aparıb. Burada maşını zədələyərək 94 000 manatlıq ziyan vurub.
Qeyd edək ki, bir müddət öncə “Miss Azerbaijan” müsabiqəsinin qalibi, bloqer Raziyyat Əliyeva döyülməsi və sosial şəbəkələrdə naməlum şəxslərin onunla bağlı videolar paylaşması ilə əlaqədar polisə müraciət edib. Bu videolarda Ziya adlı şəxs onu xəyanət etməkdə ittiham edib. R.Əliyeva görüntülərlə bağlı ictimaiyyətə və polisə müraciət edərək şiddətə məruz qaldığını bildirib.
Aparılan araşdırmalardan sonra Z.Hüseynzadə barəsində cinayət işi başlanılıb və o həbs edilib.
***
İş adamı Ziya Hüseynzadanin məhkəməsi başlayıb.
Bakı Ağır Cinayətlər Məhkəməsində keçirilən iclasda təqsirləndirilən tərəfin Z.Hüseynzadənin həbsdən ev dustaqlığına buraxılması ilə bağlı vəsatətə baxılıb, lakin təmin edilməyib. Zərərçəkmiş şəxslərdən birinin vəkili Asim Abbasov “Qafqazinfo”ya bildirib ki, hazırlıq iclası təxirə salınaraq yanvarın 17-nə təyin edilib.
Bundan başqa, zərərçəkmiş şəxsin vəkilləri vəsatət qaldıraraq prosesin qapalı keçirilməsini istəyiblər. Müdafiə tərəfi vəsatəti onunla əsaslandırıblar ki, istintaq materiallarında ailə sirri təşkil edən məlumatlar var.
Müttəhim Hüseynzada qarşı tərəfin vəsatətinə etiraz edib. O, hakim heyətindən məhkəmə istintaqının açıq keçirilməsini, media nümayəndələrinə çəkiliş aprmaq üçün icazə verilməsini xahiş edib.
Sədrlik edən hakim Siyavuş Hacıyev mediaya görüntü qeydə almaq üçün icazə verib. İstintaqın qapalı aparılması məsələsinə isə hələ ki münasibət bildirilməyib.
