Ötən ay Kanadanın Toronto şəhərində vəfat edən Vətən müharibəsi iştirakçısı Sadiq Adıgözəlzadənin cənazəsinin Azərbaycana gətirilməsində Diasporla İş üzrə Dövlət Komitəsi xüsusi rol oynayıb. Komitə, həmçinin Kanadada keçirilən yas mərasimlərinin bütün xərclərini qarşılayıb.

Qutb.az xəbər verir ki, bu barədə Kanadadakı Azərbaycan Evi rəsmi paylaşım edib.

Toronto şəhərində keçirilən vida mərasimində 450-500 nəfərədək soydaşımız iştirak edib. Azərbaycan Evi və Gənclər Birliyi (YUAC) təşkilati işləri öz üzərinə götürüb, bu prosesdə Sultanhüseyn Qasımzadə və Nicat Nəcəfovun da fəallığı qeyd olunub.

Azərbaycan Evinin açıqlamasında bildirilib ki, bu dəstək yalnız mərhumun ailəsi üçün deyil, bütün diaspor üzvləri üçün böyük bir mənəvi dayaq kimi qiymətləndirilir.

“Bir daha Komitənin rəhbərliyinə və əməkdaşlarına səmimi təşəkkürümüzü bildiririk. Allah mərhuma rəhmət eləsin, ruhu şad olsun”, – deyə paylaşımda qeyd olunub.

Sadiq Adıgözəlzadə 44 günlük Vətən müharibəsi dövründə könüllü olaraq Kanadadan Azərbaycana gələrək döyüşlərdə iştirak etmişdi.